Сизни киши жолоучусуча тюйюл,
Жаш анасынча сюйеме, тауларым,
Мен сизге киши хапарчысы тюйюл,
Ёстюрген поэтигизме, тауларым!

Къушугъуз жашармы сизде учмайын?
Сизсиз уйа къайда этер, тауларым?
Акъсыл къаягъа къанатын урмайын
Ол кёкге да къалай кетер, тауларым?

Мен, окъ тийиб, жатсам кюйген аулакъда,
Къаным жерге саркъа туруб, тауларым,
Анаммы аты кибик, ол сагъатда
Мени ахыр сёзюм болур: — тауларым!

1942