СТИХОТВОРЕНИЕ

Печать

Киши ёталмагъан къаядан ётсенг,
Жюрегинги къол аязынгда элтсенг, –
Поэзия деген олду.

Кесинг жаралы болуп, къанынг саркъа
Тургъанлай, жарсысанг жаралылагъа, –
Поэзия деген олду.

Жоюлгъанлагъа жарсыу эте къалгъан,
Дайым саула ючюн тынгысыз болгъан –
Поэзия деген олду.

Таугъа, гумулжукга да хурмет этсенг,
Къарыусузгъа болушургъа терк жетсенг, –
Поэзия деген олду.

Тенгизни, гитче шауданны да сюйсенг,
Терекни жел сындырмазын тилесенг, –
Поэзия деген олду.

Пилге, къозугъа да жашау тилесенг,
Жюрегинги къол аязынгда элтсенг, –
Поэзия деген олду.

1964