КЪАЯДАГЪЫ ГОККА ХАНСХА

Киши жерлеринде кёрген тюшюмсе, 
Гокка хансым, къысыр къаяда ёсген.
Къарла жаугъан кюнледе да тюшгенсе,
Къыйынлыкъда тургъан заманда, эсге.

Жерими гюлю, кёп тюшдюнг эсиме,
Мухажирлик – азап болгъанын билдим.
Жеримде, къапланып сени юсюнге,
Уппа этерге узакъда термилдим!

Къаялада ёсгенинги узакъда
Эсиме тюшюрдюм да, салам ийдим,
Жаным такъырлыкъда къыйналгъан чакъда,
Чыдаргъа кюреше, сенден юйрендим.

Жарсыгъан, арыгъан да сагъатымда
Эсиме тюшесе да, мен сенден да
Уялама: къаяны къанатында
Ёсесе, хорлатыу жокъ эсингде да!

Ёсесе, къаты къая ташны хорлап,
Ыспас, сейир эте, сени кёреме,
Къыйын сагъатымда мен, санга къарап,
Биягъыча, мен сенден юйренеме.

1962