САЛАМ ЭРТТЕНЛИК

Мен биринчн китабыма да
"Салам, Эрттенлик!" деп атагъан эдим.
Энтда Сюеме бар тангла ахшы болсала,
Жер мирзеулю, жулдузлу болса кёк да.
Алда къаллай тангла сакълагъанларын
Билмейин, атагъан эдим биринчи
Китабыма ол атны. Артда арып,
Кёп эрттенликледе ачы суу ичип,
Тургъанда да, китабымы атындан
 Ёнгеленмедим, суудан, ётмекден да,
Чыгъып кёп къыйынлыкъланы отундан:
 "Салам, эрттенлик!" - деп къатлайма ант да.
Алда не болгъанын билмейме. Артда
Ачыу,къыйынлыкъ кён къалды, билеме.
Ёнгеленмей китабымы атындан,
Эрттенликге алгъыш эте, келеме.
Отуз жыл бурунча, салам береме
Баламы, дунияны да эрттенине.
Отуз жыл бурунча, салам береме
Жерде мирзеу, кёгет да битгенине.
Туман келир, кетер, жауар, эрир къар,
Эрттенлик а къалыр, мирзеу къалгъанча,
Келген, кетген да этер аман хапар,
Эрттенлик а турур, суула тургъанча.
Мен юйюме кирген эрттенликге да,
Сау дуниягъа келген эрттенликге да,
Отуз жыл алгъынча, салам береме,
Таза суугъа да, жылы ётмекге да!..

1966